خواطر متغرب تونسي

الأوسمة :

وانا نحوس عبر صفحات النات
توقفت على مدونة لمتغرب تونسي
قريتها اثرت في و بكاتني
حبيت نقلها لاحلى زهرات

tt

مانيش مستانس نشكي مل غربة
بالرّغم من بعدي عن أهلي و الصّحبة
أما اليوم فاض الكاس
و طفطف الهمّ على قلبي يا ناس

اليوم و أنا ماشي في اللّيل سارح في ملك ربّي
شمّيت ريحة مسك اللّيل، تفكّرت الخضراء و حسّيت بوجيعة في قلبي
و في لحظة دخلت الذكريات من غير ما تدقّ على بابي
و بدات تسرح و تتغلغل في عقلي و تفكّرني بأحبابي

هي ذكريات على قدّ ماهي حلوّة على قدّ ماهي توجع
خاطر مادامك متغرّب صعيب أنّها ترجع

متوحّش سيدي بو سعيد و منارتها
مشموم الفلّ، القهوة العربي، سيدي الشّبعان و قعدتها
متوحّش سهريّة مع بابا و أمّي
نحكي معاهم فيها و ننسى همّي
ولاّ تبنيكة في قهوة إيناس
فين اللّمة و الضّحكة الحلوّة مع عزّ النّاس

في كلمة متوحّش بلادي
وين أهلي و أصحابي و أندادي
أما زايد الحديث توّة خاطر الصّبر باهي
و يجي يوم و نروّحلك يا تونس و نرجع زاهي